Ezaugarriak

Inguman bildutakoa ez da bibliografia nazional bat, eta ez da dokumentu bakoitzaren deskribapenik edota baloraziorik egiten (euskararen kalitateaz, adibidez).

A) Inguman euskarazko goi-mailako ekoizpena katalogatzen da. Beraz, euskaraz argitaratzen duten erakunde eta aldizkarietako lanak jasotzen dira baina baita ere, gaztelaniaz argitaratu diren liburu eta aldizkarietako euskarazko atalak eta artikuluak.    

B) Inguman katalogatutako lanek, datu-baseko batzordeak finkatutako katalogazio irizpideak bete behar dituzte: goi-mailako lanak izan behar dira, hala nola, ez dira katalogatzen, esaterako, egunkarietako iritzi artikuluak; luzera jakin bat izan behar dute (artikuluen kasuan, adibidez, hiru orrialdekoak gutxienez) eta Datu-base Batzordeak onartutako erakunde batek argitaratua edo ekoiztua izan behar dira.

C) Inguma datu-basea etengabe eguneratzen da. Inguman dagoena beraz euskarazko ekoizpena dela ziurtatu daiteke, baina bertan ez dauden goi-mailako lanak ere badira, eta horien bilketa urterik-urtera hazi egiten da, erakunde  eta bilduma berrien lanak barneratuz.

D) Inguman katalogatzen diren itemak, printzipioz, euskaraz sortuak dira edo, itzulpenen kasuan, euskarara itzuliak (kasu horietan, itzultzailearen lana da balioesten dena). Baina azken urteotan euskal komunitate zientifiko-intelektualaren garapenak fenomeno berri bat ekarri du: taldeka sinatutako lanetan litekeena da partaide guztiek euskaraz ez jakitea; orobat, posible da euskara ez dakien egileren baten lana euskaraz argitaratzea, jatorrizko hizkuntzaren berri eman gabe. Ondorioz, Ingumak ziurtatzen du lanok euskaraz argitaratu direla, baina ez du bermatzen egile guztien euskarazko ezagutza.